Helga Soffia

Íslenska sauðkindin

2011-02-21T16:43:00.002Z

Fann bloggið mitt óvart í dag, hafði alveg gleymt því að ég átti einu sinni líf þar sem ég gat eytt tíma í að moka flór úr hausnum á mér inn á Veraldarvefinn. Nú er ég að bíða eftir manni uppi á Fr. Berglaugu og tel lopapeysur á Laugaveginum, kreppan hefur komið lopanum aftur í tísku enda Icelandic Design, sem er óskaplega móðins líka. 14 lopapeysur en það merkilega er að ég hef ekki séð eina manneskju sem ég þekki, þetta er eins og að vera í útlöndum, fyrir utan allar lopapeysurnar ... 15 ... 16 ... þetta minnir mig á það þegar við Embla fórum í Versló í gamla daga til að stela flöskum og telja Bossjakka. Já, maður hafði vissulega meiri tíma í den.

Óverkill

2008-08-27T19:47:00.002+01:00

Ég er mjöööög stolt af íslenska handboltaliðinu, ég fór út á Skólavörðustíg og klappaði fyrir strákunum, en svo fór ég heim, fékk mér bjór og horfði á hátíðina í sjónvarpinu því ég óttaðist að þetta færi út í klígjupakkann. Og djöfull er ég fegin. Hvað er í gangi þarna? Öxar við ána tvisvar, allskonar fólk upp á sviði... mér líður eins og ég sé með pest og viti ekki hvort þetta ætli upp úr eða niðrúr mér. Ohhh... þetta var sætt en fór svo út í rugl. RUGL! Væm æl oj. Held ég þurfi að stinga títuprjónum undir neglurnar á mér aðeins til að jafna mig.
Áfram Ísland.

Dýr sopi

2008-07-30T12:35:00.002+01:00

Í blíðviðrinu í gær buðu foreldrar mínir mér í bíltúr til Þingavalla. Við ákváðum að eiga svona súperíslenskan sumardag sem maður geymir í minninu og dustar af sér til hughreystingar þegar húmar að og maður íhugar alvarlega að flytja endanlega af landi brott. Hugmyndin var að athuga hvort enn væri bissniss á Hótel Valhöll og ef svo væri fá sér kaffi og með því úti í sólinni eins og í gamla daga. Ég veit að það er ógurlegt efnahagsástand og ég veit að verðlag er hærra hér en alls staðar en - 980 kr. fyrir vöfflu!!!! Kommon! Enda spurði ég aumingja afgreiðslufólkið hvort það væri að grínast, þau svöruðu því að þau sömdu ekki verðin, sem ég vissi alveg en þetta datt svona út úr mér um leið og ég náði andanum aftur. Drengurinn lét reyndar ekki þar við sitja heldur bætti við að þetta væri nú þjóðgarður og út úr bænum og mikill flutningskostnaður ... Aha, sagði ég en stillti mig um að segja við hann að það væri þá forvitnilegt að vita hvað vafflan kostar á Egilsstöðum. Að endingu fékk ég mér pilsner en far og mor kapútsjínó. Fyrir þetta borguðum við 1500 krónur. For alvor! Ég er að hugsa um að flytja endanlega af landi brott.

úffff

2008-07-14T15:59:00.002+01:00

Er med obboslett kattaobnæmi... er ad passa kisuhnodra fyrir Helgu frænku... ohhh, skelfing... veit ekki hvort þad er antihistamínid sem gerir mig svona syfjada eda bara obnæmid sjált eda bædi. Vont ad vinna svona. bööööö.

Vinna

2008-07-09T15:34:00.001+01:00

Pikkpikkpikkpikkpikkpikk pikkpikkpikkpikkpikkpikkpikk pikkpikkpikk pikk pikk djöfull er ég leið á því að vinna í þessu veðri.

Ísland

2008-07-04T13:23:00.002+01:00

Ég er komin til Íslands. Veðrið er gott og sumarblíða í hjörtum fólksins. Glimmrandi gott allt saman.

Spánn EM meistarar 2008

2008-06-29T23:45:00.001+01:00

Vei!

Vísismenn óvísir

2008-06-26T16:44:00.002+01:00

Í gær barst í tal hversu furðuslæm visir.is væri orðin. Í dag sannfærðist ég um þetta endanlega því í einni fréttinni stóð að Ben Affleck og Jennifer væru að "vaxa í sundur". Jahá!

Ich habe kein geld

2008-06-25T08:06:00.003+01:00

Einhvern veginn er þetta sú þýska setning sem lifir alltaf í hausnum á mér, enda alltaf sönn. Þó sjaldan sannari en nú. Ég fann ekki kortaveskið mitt áður en ég fór frá Tarragona og er því eins og helsært dýr því mér tókst að borga visareikningin ógurlega sem varð til í Ikea við flutningana, en sjálft kortið er einhvers staðar inni í hól - eða á bak við skáp eða milli þilja. Ég leitaði hátt og lágt í miklu panikki en allt kom fyrir ekki. Reyndar hafði ég tekið upp debetkortið áður til að fara í búð þannig að ég er ekki vopnlaus en þegar ég ætlaði að beita því kom í ljós að gengishrunið hefur étið upp þær fáu krónur sem á reikningnum voru. Þetta er ekki hægt. 132 krónur fyrir evru ... og pundið ... offff! Við höldum til Edinborgar á eftir. Nú ætla ég út í banka að ná í spænska debetkortið mitt, ekki að það komi að nokkru gagni. Adios í bili.

Sjór

2008-06-22T21:51:00.002+01:00

fór í sjóinn í dag, það var dejligt. í sjónum er gull. án gríns. costa dorada - gyllta ströndin. töff.

Em Öm

2008-06-21T22:05:00.003+01:00

ömurleiki. ef spánverjar fara svona líka hætti ég að eyða tíma í EM. hvad er i gange, eins go jesper grönger sagði um árið. holland skítur á sig, króatía skítur á sig og portúgal - öll liðin sem maður heldur með. er riðlakeppnnin að fara með bestu liðin? eru þau algjörlega búin á því þegar þau koma upp úr riðlunum? eða mútaði rússneska mafían liðinu? hvad er i gange, for satan? ömurð. ég ætla að hætta að horfa á óverpeid drengi fædda fokking áttatíogeitthvað sparka í bolta og vinna ferkar eða fara á ströndina, eða bæði. mér finnst bæði betra.

Blond móment

2008-06-19T16:51:00.002+01:00

Átti mjög blond móment hérna áðan: ákvað að bæsa hina hilluna í dag svona í tilefni þess að við erum að fá gesti á morgun og týndi því úr henni bækur og annað, efst á hillunni var vínrekki sem við keyptum á sunnudagsmarkaðnum fyrstu helgina okkar hér. Í stað þess að taka flöskurnar úr rekkanum eins og eðlileg manneskja kippti ég til mín rekkanum með þeim afleiðingum að 2 spari spari reserva rauðvínsflöskur splundruðust á gólfinu og rauðvín og glerbrot þeyttust um allt gólf, upp á veggi, á fínu kortin sem ég var nýbúin að festa á vegg og ofan í fjöltengið. Ég er búin að skúra 4 sinnum en það er samt lykt hérna inni eins og eftir brjálað jólaglöggspartý. Þetta er næstblondasta mómentið mitt held ég, það svakalegasta var þegar ég stóð mig einu sinni að því að fara að flýta mér að mála því málningin var að verða búin.
Annars erum við svona að ganga frá og pakka; ég reyni að muna hvað ég á af skóm og fötum heima, ég veit að það er troðið í báðum geymslunum út að dyrum af drasli þarna heima en samt finnst mér ég ekki eiga neitt almennilegt til að fara í - ef krónan væri ekki þetta plat sem hún er þá myndi ég slá þessu upp í kæruleysi og dressa mig upp í Edinborg að góðum, íslenskum sið. En nei. En gallabuxur þarf ég. Og kannski skó. Alltaf skó. Maður á aldrei nóg af skóm. Það vissi amma og það vitum við Hulda.
Verð að vinna núna á meðan þvottavélin sér um þvottinn. óverendát.

14 dagar

2008-06-18T15:22:00.002+01:00

Svona er planið:
í dag: vinna, bæsa hillu vinna meira, setja í þvottavél og svo vinna
19/6: vinna, þrífa, taka til, vinna
20/6: vinna, taka á móti Berglindi og Ingunni Önnu, horfa á EM
21/6: vinna, sýna gestum fínerí í borginni, vinna meira
22/6: pakka, vinna og sniglast með B&I, horfa á EM og vona að Podemosar tapi ekki fyrir Ítölum ... right
23/6: fara til Barcelona, halda upp á Sant Joan á Bercelonetaströndinni með öllum hinum, kampavín og flugeldar
24/6: Hitta Pollo&Gerald, Nicolas, Auju og Tóta og fleiri kannski, fara í bæjarferð.
25/6: fljúga til Skotlands, EM, fara til Hemma, hitta AR og fara í Ástuíbúð
26/6: vinna, hitta Aus og Hemma og horfa á bolta
27/6: vinna, tala við AR og H. elda kannski handa þeim eitthvað gott
28/6: vinna, fara með Aus kannski í búðir að leita að gallabuxum (moi) og pilsi (AR)
29/6: vinna, EM úrslit
30/6: Pakka, vinna, fá sér hvítvín með A&H
1/7: Til Íslands.

Mídas- what an ass

2008-06-11T16:18:00.003+01:00

Fer ótrúlega í taugarnar á mér að Geiri gullfingur hafi unnið 9 milljónir í víkingalottóinu. Kannski verður margur ekki af aurum api, kannski lenda aurarnir bara hjá mörgum apanum ... úff. Ætla samt að reyna að transenda og segja ommmm. Ommmmm.

EM

2008-06-10T21:34:00.002+01:00

Vei! Holland! Vei! Spánn! Viva! Vei! Svíþjóð! Hurra! Vei! Vei! Og vei - Ítalía tapaði, skíttapaði, vei! Gott á þá! Meira af þessu.

Ojbara

2008-06-08T14:41:00.003+01:00

Ég er með oj í kroppnum og sálinni eftir búlluna í gær sem við settumst inn á til að fá okkur bjór. Sátum semsagt á Bar Tortosa með bjór og lásum í Hola á meðan gamli karlinn við hliðina á okkur prúttaði við kerlinguna á bak við borðið um drátt. Fannst of mikið að borga 20 evrur fyrir að fá að fara upp með tvítugri stúlku með sálarlaus augu og svart, slegið hár. Hvernig dettur fólki í hug að flagga vændi sem einhverjum femenisma? Djöfulsins viðbjóður.

Jahérna, nú dámar mér

2008-06-07T23:21:00.002+01:00

Við hjónaleysin vorum að koma af hóruhúsi. For alvor. Vorum á leiknum þar á undan. Protúgal vann. Ágætt. Enda ekki annað hægt en að fara á hóruhús. Who'd have thunk it?

EM!

2008-06-07T14:58:00.002+01:00

Portúgal-Tyrkland í dag. Vei!
Við Sössibé vorum að koma inn, ég er að koma mér í vinnugírinn, blogga smá á meðan. Við fórum á Forum-torgið að kaupa grænmeti af bændum: ferskjur, epli, appelsínur, steinselju, belgbaunir, kirsuber, vínber og papriku. Ég ætla að wokka og læra að binda hnút á kirsuberjastöngla með tungunni, maður verður að hafa eitt partýtrikk. Tarragona er falleg og ferðamannastraumurinn að aukast sýnist manni, en ekki alveg eins og í Undraborginni, hér sér maður glókolla í familíuferðum, unglinga taka myndir af rómverskum rústum og húsaskreytingum og spænska krakka í skólaferðum. Engar rauðþrútnar fótboltabullur eða fullar gæsir með glimmer á brjóstunum í augsýn. Svo bíð ég eftir funhita og fríi til að geta skellt mér í sjóinn. Læt mig hafa það þrátt fyrir sjúklegan ótta við hákarla, þeir eru heldur ekki svo margir hér í Mare Nostrum. Ekki eins og þessir í Ástralíu sem virðast standa á beit við helstu baðstrandirnar. En svei mér ef ég er bara ekki komin í gírinn. Brúmm Brúmm.

Náttúra og geimkúkar

2008-06-05T14:51:00.002+01:00

Ég hef náð að snúa sólarhringnum algörlega á hvolf með undraverðum hætti og sama hvað ég reyni að breyta þessu fer þetta alltaf í sama farið. Um fimm í morgun fór ég upp á þak til að taka niður þvott. Það var aðeins tekið að birta og til norðurs var gríðarfallegur skýjabólstri, svona eins og maður sér í enskum málverkum af sjórorrustum . Í loftinu var lykt af greni og júkalyptus. Kettirnir voru hættir að breima og fuglarnir hvísluðu góðan dag. Þá fór ég að sofa.
Vaknaði við flamenkósöng og klapp hjá nágrönnunum. Sá á mbl.is að geimklósettið er komið í lag. Gott að vita af því. Mér finnst að það eigi að taka fyrsta kúkinn sem þarna fer niður, gullhúða hann og setja hann á safn, enda alveg örugglega dýrasti kúkur mannkynssögunnar. Ég veit ekki alveg hversu skynsamar skepnur við erum, heimurinn er á heljarþröm, fólk deyr úr hungri og sjúkdómum, skortur er á korni og eldsneyti og við stöndum í því að fixa klósett úti í geimi. Nú er ég mjög hlynnt vísindarannsóknum og finnst sjálfsagt að peningum sé eytt í þær, en það má alveg forgangsraða. Annars er ég nokkuð impressed - ég veit ekki um neinn sem hefur getað fengið pípara svona fljótt.

Ör eftir brunasár

2008-06-04T14:43:00.001+01:00

Sölvi: Sérðu?
HS: Örið?
Sölvi: Já, svona er maður á litinn.
HS: Já, bleikur.
Sölvi: Já, eins og svín. Viðbjóður.

Klaufadýr

2008-05-31T18:55:00.002+01:00

Blablablabla niðri á torgi að kvöldlagi.
SB: "Nema hestar eru auðvitað ekki spendýr."
*Ég stari glottandi á samræðufélaga minn* "Nú, hvað þá fuglar, fiskar eða skriðdýr?"
SB: "Ææææi, þú átt eftir að setja þetta á bloggið þitt!"
Ég: "Nei, þetta er of fáránlegt."
SB: "Æææi, ég var svo fastur að hugsa um að þeir væru klaufdýr ... *HS glottir* nei, eða hófdýr, oh, djöfull." SB dæsir, brosir, hristir hausinn og fær sér bjórsopa.

(Hann er í rauninni ákaflega vel gefinn og vel að sér þessi elska en stundum verður maður klaufi, jafnvel í hugsun, eftir lítinn svefn og góðan bjór.)

Heim í sumar

2008-05-19T16:57:00.004+01:00

Hellú, eftir að hafa lesið viðtal við Oddnýu Sturludóttur í Observer höfum við sannfærst um ágæti Íslands og hoppandi kæti íslensku þjóðarinnar og stefnum því á 2 mánaða skemmtiferð á Frón í sumar. Þar af leiðandi verður húsið okkar hérna á í Tarragona laust í júlí og ágúst og við viljum endilega leigja það út. Frekari upplýsingar má finna á spánýrri bloggsíðu http://www.tarragonahus.blogspot.com

Og svo 2 í viðbót

2008-05-11T13:49:00.003+01:00

Sössi á svölum og horft inn í gestaherbergi af svölunum.

Fleiri myndir

2008-05-11T12:21:00.005+01:00

Fyrst koma myndir af gestaherberginu og síðan af stofunni, ég kann ekki að rótera þessum myndum þannig sú fyrsta er á hlið.

Nokkrar myndir

2008-05-11T12:16:00.005+01:00

Þetta er af terrössunni, ætti að glitta í dómkirkjuturninn þarna einhversstaðar

Engar myndir af húsinu enn

2008-05-10T17:34:00.003+01:00

En hér er mynd tekin út um stofugluggann. Það er slagveður í dag. Svona eins og reykvískt sumar, lókalfólkið er trámatíserað og götur auðar eins og það sé júróvisjón eða eitthvað - hvenær er annars júróvisjón?

Tarragona

2008-05-07T12:24:00.001+01:00

Hæ. Við erum komin í hús í Tarragona. Komin með net og síma! Vei.
Myndir og frekari upplýsingar þegar um hægist.
Heimilisfang: C/Comte 24
43003 Tarragona
Spánn

Sími: 0034 977245583

hasta la proxima, HS

Gestir og gangandi

2008-04-22T22:33:00.002+01:00

og gangandi gestir - ég hef ábyggileg lækkað í loftinu í dag því ég fór í heljarinnar göngutúr með Ástu og Huldu sem eru hér í heimsókn. Hulda fer á föstudaginn en Ásta verður áfram og kemur með okkur að sjá Nick Cave og svo til Tarragona að setja saman Ikea húsgögnin því hún er Ikeasamsetjarinn minn. Jamm. En nú fer ég að sinna gestunum.

Sigurjónsson #2

2008-04-18T13:56:00.002+01:00

Varði "the wee hours" í Raval hjá Maríu og Sjonna. Sjonni lét renna í bað, Guðjón Teitur svaf og María gerði öndunaræfingar. M&S fóru upp á spítala rétt fyrir átta, og eignuðust risabarn (á spænskan mælikvarða) upp úr 9 í morgun, 4.8 kg. Þetta gekk allt saman eins og í sögu. Móður og barni heilsast vel og ég er farin að leggja mig.

Be careful what you wish for...

2008-04-16T19:30:00.002+01:00

Í dag gerðist 2: annarsvegar bauðst okkur hús á 4 hæðum með terrössu í bæ 96km fyrir sunnan Barcelona til leigu í amk 1 ár og hinsvegar bauðst okkur listamannsíbúð (stúdíó svipað Kjarvalsstofu) við Signubakka í París í maí og júní. Hvað á maður til bragðs að taka. Húsið kostar aðeins meira, krefst 2 mánaða tryggingar og húsgagnakaupa... París er æði á vorin en þá erum við aftur heimilislaus í júlí. Demit. Of mikið af því góða kannski? eeeeeeeeeeeeeeeeeeeee rassgat

Málstol, heilabilun eða Freudian slip?

2008-04-14T19:28:00.002+01:00

"Ég sé mína breing útsædda þarna suðurfrá," sagði Sölvi alvarlegur á svip í gær.
"Já!" sagði ég.

Seinna um kvöldið, þegar við vorum að sofna sagði ég: "Ég ætla að setja þetta á bloggið mitt."
"Æiii, neiiii," sagði Sölvi.
"Jú," sagði ég.

Til málamynda

2008-04-04T18:11:00.000+01:00

Blogg blogg blogg blogg, blogg blogg blogg blogg blogg blogg blogg.

teljari enívonn?

2008-04-01T17:35:00.001+01:00

Veit einhver hvernig maður setur teljara á bloggið sitt? Ekkert 1. apríls grín með þetta, ok? Ég bara þoli það ekki.

Mánudagsskjall: Inga Þóra

2008-03-31T22:29:00.003+01:00

Inga Þóra er glæsileg kona og það gustar af henni hvert sem hún fer - og hún er víðförul: Inga Þóra er heimsborgari og ferðast mikið, drekkur í sig menningu og sögu þeirra staða sem hún kemur til og segir síðan af þessu gríðarlega skemmtilegar sögur. Þá segir hún oft frá hádramatískum hlutum, smellir lófanum í borðið með miklum tilbrigðum og skellir síðan gjarnan upp úr og hlær svoleiðis að maður tekur undir þangað til að tárin streyma. Inga er mikill skörungur og dugnaðarforkur. Hún er líka ákaflega opin fyrir hugmyndum og nýjungum og sífellt að lesa sig til um hitt og þetta og sækja námskeið og ráðstefnur. Yngra fólk hefur ekki roð við henni, félagslíf hennar er með ólíkindum: myndlistaopnanir, saumaklúbbar, matarboð, leikhúsferðir, tónleikar, veislur og fundir. Ég hef oft undrað mig á því hvernig hún fer að þessu, alltaf jafn til í að mæta á næsta viðburð, og alltaf eins og drottning til fara. Það er mikill aristókratabragur á Ingu enda oft vísað til hennar sem Baronessa Von Hapsburger, það kæmi ekki á óvart ef uppgötvaðist að hún hefði verið barónessa í fyrra lífi - og þá á ég ekki við barónessu sem er aðeins upp á punt á handleggnum á von Baron, heldur barónessa sem heldur salon og styrkir listamenn og heldur veislur sem allir vilja mæta í. Inga Þóra er örlát og hefur yndi af því að gefa fólkinu sínu litlar og stórar gjafir, bjóða því upp á mat og drykk og þegar stemningin er rétt spáir hún manni heillaspár í spil. Kostakona. Inga Þóra rúlar.

Eldri

2008-03-30T13:14:00.002+01:00

Í dag er ég eldri en ég var í gær - auðvitað er það staðreynd hvers dags - en í dag á ég afmæli. Ég er 35 ára. Eftir að hafa kynnt mér málið yfir morgunkaffinu hef ég komist að því að ég er ekki miðaldra enn, að minnsta kosti ekki sem Íslensk kona. Meðal ævialdur íslenskra kvenna er 82 ár sex mánuðir og tveir dagar. Í Andorra - sem er hérna steinsnar frá - er meðalaldur kvenna 86 ár 2 mánuðir og 3 dagar.
Ég hélt nefnilega að ég væri kannski orðin miðaldra og ætlaði að fara að finna mér konubuxur í konubúð til að halda upp á það. En aðeins í Hondúras, Írak, Belís, Aserbadjan og Túvalú væri ég komin á miðjan aldur. Ég hef aldrei komið til þessara landa og efast um að ég geri það nokkru sinni. Í Tanzaníu, þar sem ég ólst upp, væri ég óver ðe hill, konur þar lifa lengur en karlmenn (konur gera það almennt um allan heim) en mega kalla sig góðar ef þær verða eldri en 53 ára. Í Svasílandi væri ég öldungur, þar hrekkur fólk upp af laust upp úr þrítugu.
Þetta er sem sagt allt saman afstætt, því eins og maðurinn sagði: I was so much older then - I'm younger than that now.

Nælon Tælon Tæfan

2008-03-27T19:10:00.003Z

Mig dreymdi að Steinar Bragi og Sölvi hefðu stofnað með sér félag um bókmenntir sem hét Nælon Tælon Tæfan eða Tævan (sá það ekki skrifað) en stefndi í að verða hljómsveit - með Steinar á bassa. Verð foreldralaus í Barselóna á morgun. Í dag barst mér kort frá tengdamóður minni. Hún hefur því unnið sér inn Mánudagsskjall næstu viku.

Páskar II

2008-03-24T17:54:00.002Z

Butifarra á grillið, Bloody Mary í glösin, hvítar baunir með hvítlauk, íslenskt lamb með kartöflumús með Dijon. Kaffi, rauðvín, te og ananas. Spilað út á svölum í sólinni, rætt um flugvelli í borgum, flughraða ýmissa véla og húsnæðisástand vina og vandamanna. Ég og mamma höfum enn ekki farið út úr húsi. Far og Sölvi fóru út að kaupa bjór fyrir svona 2 tímum, mig grunar að þeir hafi ákveðið að drekka einn úti á bekk. Nema þeir hafi fundið fótboltaleik.

Páskar

2008-03-23T17:59:00.003Z

Gleðilega páska. Við erum að elda lambalæri frá Íslandi. Ora-baunir ætla Embla og Ingó að lána okkur. Rauðkál finnst hvurgi í Barselóna, hvorki hrátt, soðið né pikklað. Það er allt í lagi. Við átum páskaegg, ananas, vatnsmelónu, brauð, skinku, Gruyere, Brie og kæfu í morgunmat.

Föstudagurinn langi/góði

2008-03-21T09:09:00.002Z

Föstudagurinn langi heitir Good Friday á ensku - og góður er hann því mor og far koma í kvöld. Þá verður gaman. Þá verður fiesta, folks. Spánverjar eru mjög fiestaglaðir og virðast grípa hvert tækifæri sem gefst til að taka sér frí í vinnunni, klæða sig í múnderingar og henda karamellum hver í annan. Heyrist samt ekki múkk í þeim núna. Ætli þeir séu að ausa yfir sig ösku og skammast sín fyrir að piltur frá Nasaret hafi verið negldur upp á kross fyrir rúmum 2000 árum? Sé á mogganum í dag að snillingar á Filipseyjum eru að gamna sér við það að láta krossfesta sig og hýða. Dísús kræst, segi ég nú bara. Ég ætla að láta nægja að fá mér kaffi úti á svölum og brosa framan í sólina sem blessar allt og gæti ekki verið meira sama um það hvort menn krossfesta sig eða aðra.

Sól, fáránlegt gengi og kuldakast

2008-03-20T10:12:00.002Z

Hejsan. Evran fór upp í 128 kr. í gær akkúrat þegar Sölvi var að taka út úr hraðbanka. Ég tók svo út pening 5 mín. seinna og þá var hún komin í 123. Auðvitað dugði þetta til að eyðileggja daginn fyrir Sössa Bjössa, enda orðinn hundleiður eins og við öll hin á þessu fáránlega jójói. En í dag er sól. Ég hef samt kveikt aftur á rafmagnsofnunum því að kuldakastið sem þeir spáðu spámennirnir er komið. Hitinn er svona um 14° C sem fólki í vonskuveðri í Atlantssjó þykir kannski bara fínt - en hér er manni hálfkalt, bæði vegna þess að það er engin kynding í húsum en líka vegna þess að það var orðið svo andskoti hlýtt og gott hérna og viðbrigðin því nokkur. Ég fór annars að lesa gamalt skotablogg í gær í leti minni og skammaðist mín ógurlega, stafsetningavillur galore og oft alveg stóreinkennilegar setningar. Samt gaman að geta flett svona aftur í tímann aðeins - plúsinn við bloggið er að það er ekki eins deprimerandi og dagbókarfærslur... persónulega held ég að ég skrifi aldrei í dagbók nema þegar ég er deprimeruð eða angurvær - ojojojojojojoj. Muna: brenna deprimerandi dagbækur í sumar.

Bæ.

Pirr dagsins eru þrjú

2008-03-18T16:20:00.002Z

1. Ráðamenn þjóðarinnar: svar þeirra við efnahagsfokkinu er að bíða þangað til að þetta lagast. Eins gott samt að þessir bjánar eru ekki í slökkviliðinu.

2. Tónlistarfastistar: fólk sem finnst það alltaf hafa miklu betri tónlistarsmekk en allir aðrir og skiptir sér sífellt af þeirri tónlist sem verið er að spila hvort sem þeir eru gestgjafar eða gestir hjá öðrum. Skilur oft eftir sig geisladiska um allar jarðir í æsingnum.

3. Ryksugur: leiðindatæki, hávær og óþjál. Vil fá ryksugu sem er eins og bakpoki sem maður getur sett á bakið á sér... og sem malar eins og köttur eða kurrar eins og hrjótandi broddgöltur... og er þráðlaus.

Mánudagsskjall: Ásta Ásbjörnsdóttir

2008-03-17T21:17:00.002Z

Ásta er merkileg kona. Hún er gáfum prýdd: flugklár, falleg, brosmild og góð. Þeir sem til Ástu þekkja eru án efa sammála mér í því að hún er generös, á alla vegu. Hún er mikill höfðingi heim að sækja og deilir jafnan öllu sem til er með gestum sínum, hvort sem um er að ræða húsnæði, mat og drykk eða frítíma - en níska á tíma sinn er nokkuð sem eykst í nútímasamfélagi, og er óhætt að segja að Ásta sé gamaldags að því leyti. Að því leyti og engu öðru, því hún er framsækin og frumleg í hugsun og klæðaburði, vel lesin og vel að sér um heiminn og undur hans. Klæðaburður Ástu ber skemmtilegum og litríkum persónuleika hennar vitni og hafa ófáir dáðst að glaðlegum og skínandi (oft bókstaflega) fatnaði hennar. Glaðlyndið er einkennandi fyrir Ástu sem er með jákvæðara fólki, barmar sér sárasjaldan og verður seint sökuð um að vera kvartsár. Hún svarar í síma með sólskinshallói sem Tyra Banks myndi líkast til kalla "her signature hello". Tyra myndi líka segja að Ásta væri FIERCE, og hefði rétt fyrir sér. Fjíers. Ásta er traustur og góður vinur, vill fólki vel og leggur sig fram um að sinna þeim sem lent hafa úti í horni, passar upp á að enginn sé útundan eða utanveltu, hún er ótrúlega þolinmóð og umburðarlynd - og aumingjagóð, enda hefur hún gott og fallegt hjartalag. Hún er ekki bara vinur vina sinna (það er lítið mál) heldur vinalega við alla, konur og karla, krakka með hár og karla með skalla. Ég gæti haldið áfram fram á þriðjudag að tíunda kosti Ástu Ásbjörnsdóttur, en þetta er mánudagsskjall og því ætla ég að fara að ljúka þessum pistli, vil ég þó bæta því við að daman er fjarska góður penni og kann að halda partý sem enginn vill missa af, enda er stuðið þar sem Ásta er, skínandi, dansandi (ahh, já, súperdansari), hlæjandi Ásta lætur öðrum líða vel. Það er mikil gáfa. Ásta er töff. Ásta rúlar.

Sniglapóstur

2008-03-14T19:24:00.002Z

Ásta sendi sniglapóst! Vei! Kort með gríni - fáráðsgríni sem gleður mig fáráðinn - og langt bréf um glamúrlíf í Edinborg og glamúrús ferðaassessorís. Að sjálfsögðu þýðir þetta að hún hefur unnið sér inn Mánudagsskjall og áhugasamir get kíkt hingað inn eftir helgi. Annars erum við SB (lesist Sölvi Björn ekki subb) að steikja 15 lauka. 15 lauka á 15 hamborgara. Vonumst eftir sól á morgun og að Mistral-vindarnir hafi sig hæga milli 1-3.

107 kr fyrir evru

2008-03-12T20:03:00.002Z

Við fengum okkur kaffi á svölunum, croissant með súkkulaði, brauð með jamon serrano og nýkreistan appelsínusafa. En það dugði ekki til. Það er ekki hægt að vera hress þegar leigan hjá manni hefur hækkað um 23þ krónur eingöngu vegna þess að íslenska krónan er skítseiði, það þarf 107 skítseiði til að búa til eina evru. Deprimerandi. Mjög deprimerandi. Fyrir nokkrum vikum sagði Tóti brandara. Reyndi að ljúga því að okkur að evran væri komin í 115. Við trúðum honum ekki. En hann sagði: sjáum hvað þið segið eftir nokkrar vikur - þá verður þetta ekki ótrúlegt.
Og ekki heldur fyndið, segi ég. En veðrið er ágætt. Það er gott.

Mánudagsskjall: Sigurður Ólafsson bestur

2008-03-10T19:42:00.005Z

Sigurður Ólafsson hefur löngum verið þekktur fyrir drengskap sinn og hugprýði. Hann er einkar dagfarsprúður og ljúfur, góður við gamalmenni og börn og sannkallaður séntilmaður við konur. Gáfur hans eru annálaðar, og þá ekki eingöngu bókvitið heldur einnig brjóstvitið, enda kunna vinir hans vel að meta ráð hans og mælsku. Sigurður er þar að auki myndarlegur maður og hefur gengið undir ýmsum nöfnum þar af lútandi víðsvegar um heim, í hinum spænskumælandi heimi til dæmis er hann jafnan kallaður El Guapo sökum haukfrárra augnanna og klassískrar beinabyggingar. Sigurður er sérlega vel lesinn og vel að sér í flestu. Hann er umburðalyndur án þess að vera laus við gagnrýnisauga, enda er hann skynsamur með afbrigðum. Þrátt fyrir skynsemi og áreiðanleika sinn kann Sigurður aldeilis að sletta úr klaufunum og er hann jafnan hrókur alls fagnaðar þar sem hann kemur, leiftrandi húmorinn og góðlátlegt glottið aldrei langt undan. Þessir mannkostir Sigurðar hafa skilað honum mörgu, þar á meðal sérlega fallegri og gáfaðri konu sem hann á með dótturina Helgu (fjarskalega fallegt nafn á fallega stúlku) sem líkist foreldrum sínum í einu og öllu. Hefur margur haft orð á því hversu einkar vel upp alin stúlkan er og skal engann að furða.

Sigurður Ólafsson er töff. Sigurður Ólafsson rúlar. Skál fyrir Sigurði Ólafssyni.

Og þetta er allt satt. Ég kríta undir þetta hvenær og hvar sem er.

Ó, ég hef tekið gleði mína á ný!

2008-03-10T19:07:00.002Z

Sigurður Ólafsson, min gamle ven, var fyrstur til að bregðast við kalli mínu um kveðju í póstkassann (sjá neðar um snail-mail). Í dag fann ég póstkort innan um allan gluggapóstinn. Vei. Hann hefur því unnið til Mánudagsskjallsins ég set það í sérfærslu á eftir til að þetta komi upp sem sjálfstæður texti ef einhver skyldi gúggla hann.

Skítakróna

2008-03-10T11:22:00.002Z

Ég er í fýlu, mjög mikilli fýlu: evran er nú komin yfir 105 kr! Hvað er að gerast? Ber enginn ábyrgð á þessu rugli? Er ekki hægt að taka einhverja aðila til hýðingar fyrir framan þinghúsið, tja, eða fyrir framan seðlabankann? Skítapakk. Ufsapakk.
Svo er ég með satanskvef og hósta viðbjóði upp úr lungunum á mér. Dfls hlvts ndsktns.
Ég er sem sagt í fýlu.

Ítalía

2008-03-04T10:08:00.001Z

Ég er að fara til Mílanó á eftir að hitta vinkonu mína Helenu sem ég kynntist í heimavist í Tanzaníu. Vei.

ööööööö

2008-03-02T18:38:00.001Z

....hmmmm...... öööööö..... veit ekki alveg hvað ég er að gera hérna inni.... voðalegur sunnudagur eitthvað. bæ.

Ömurð

2008-03-01T15:22:00.001Z

Ég er ekki tapsár - ég vandi mig af því fyrir mörgum árum síðan. En nú hefur Sölvi unnið mig 10 sinnum í röð í rommý og það er ömurð og ég finn að ég fitja upp á nefið eins og ég gerði í gamla daga þegar ég var tapsár.

Snailmail

2008-02-27T12:02:00.002Z

Halló, mig langar í snail-mail eins og póstkort eða eitthvað. Það kemur bara gluggapóstur hingað, eina góða við hann er að hann er ekki til mín. Reyndar fékkég sendingu frá Amazon í dag, það var gaman, póstkonan hringdi bara bjöllunni og ég þurfti bara að taka lyftuna niður að ná í hann. Ekkert vesen með að standa í röð á pósthúsinu eins og svo oft áður. En ég læt addressuna mína fylgja með hér ef einhver finnur hjá sér þörf til að senda mér gamaldagspóst:

Helga Soffia Einarsdottir

c/o Silvia Dunia Ramos Rincon

Blasco de Garay 49, 5°- A

08004 Barcelona

Verð hér til 1. maí

TMM

2008-02-26T13:00:00.001Z

Vil benda á umfjöllun um Fljótandi heim hans Sölva í nýjasta TMM.

ótrúlegt en satt

2008-02-25T15:53:00.002Z

þau stórtíðindi gerðust í dag að við Blascar fórum með Ravalrósinni og Tóta í spinning í morgun. Já, spinning. Fyrir ykkur sem ekki kannist við fyrirbærið þá snýst það (pardon ðe pönn) um að hjóla eins og vitleysingur undir dúndrandi diskótónlist án þess að hreyfast úr stað. Hver hefði trúað þessu?

Nanananana

2008-02-24T18:10:00.002Z

Vei. Ég á svo fína hvíta fallega tölvu frá makk. Ég er aftur orðin makkpakk. Dell dellumeikarinn minn alltaf að dömpa fiskial memorí á bláum skjá svo þetta fór svona. Ástmaður minn kom með gripinn úr fríhöfninni á Leifsstöð. Hann kom líka með Einar Örn með sér mér til ómældrar gleði. Það var ógnargaman að hafa hann hér en hann fór á föstudaginn sem rommímeistari og ábyggilega nokkrum bjórum þyngri - eins og við húsráðendur. Held reyndar að við þurfum öll að sóla skóna okkar upp á nýtt líka þar sem að við fórum í margra klukkutíma göngutúra (með tilheyrandi bjórstoppum og rommíspili). En nú er það harkan sex: ræktin og vinna.
engar undarlegar draumfarir nýlega.

Ravalismus

2008-02-18T15:41:00.004Z

Mig dreymdi indverska leikarann Shah Rukh Khan. Hann var að leika í alveg skelfilegri mynd og ég furðaði mig á því að hann skyldi hafa tekið hlutverkið að sér þar sem hann er langstærsta stjarnan í Bollywood. Furðaði mig! Já, ég var svo sannarlega furðu lostin.

Solo

2008-02-17T18:16:00.002Z

Ég er grasekkja. Sölvi fór til Íslands til að gleðja Beggu systur sína. Hún blés til afmælisveislu og langaði til að hafa allt sitt fólk hjá sér. Hann kemur heim á morgun. Það er gott því að ég er með alveg óskaplega mikinn þrýsting í hausnum svona eins og ég sitji ofan á botni bládjúprar sundlaugar. Ég get flautað með auganu ef ég held fyrir munn og nef og blæs. Ég get hins vegar ekki losnað við helluna sem ég er með hægra megin.
Ég hlusta á The Lyre of Orpheus með Nick Cave - það er mögnuð plata. Plata ... svona kemur maður upp um sig. Hver gefur út plötur í dag?
Jæja, ég ætla að éta chilli og engifer og athuga hvort þetta hauskvef fari ekki.

Fúnkís

2008-02-14T14:48:00.001Z

Mig dreymdi í fyrrinótt að ég keypti mér pínulítið fúnkíshús sem var svo fallegt að ég fylltist eftirsjá þegar ég vaknaði.

Humm?

2008-02-13T22:55:00.002Z

Gullfiskaminnið ógurlega ... man bara alls ekki hvað ég ætlaði að blogga um ... ef hárið er rakað af ljóskum hætta þær þá að vera vitlausar? Datt þetta svona í hug... kannski ... maður hagar sér ábyggilega öðruvísi þegar maður er sköllóttur, sér í lagi ef hárið var mikill partur af ídentítedinu og jafnvel tól í samskiptum - hver man ekki eftir (ómigod sjónvarpsmarkaðurinn búinn að infiltrera heilabúið) klassíka atriðinu þar sem stúlka/kona tekur hárið niður og tilvonandi/óskandi verandi (er mikið í sagnpælingum þessa dagana) elskhuginn missir andann?
Já, en það var ekki hár sem ég ætlaði að blaðra um. Síður en svo. Helst í fréttum hjá mér er að ég er ennþá með hita og aumingjaleg öll inn í mér, hálfkjökrandi af leiðindum og sljóleika. Samt sem áður tókst mér að fjárfesta (svo hagstætt gengið) í strigaskóm í dag á 15 evrur - þeir ná að vera dömulegir, sportlegir, glamúrus, hálandalegir og pönkaðir allt í senn, nokkuð góð kaup fyrir 15 evrur (og já PV - þeir eru nr. 39). Mér finnst alltaf ágætt að fá sem mest fyrir aurinn. Ansi er mikið af svigum og þankastrikum og þrípunktum og kommum og almennum útúrdúrum á þessu bloggi mínu (bendir kannski til að ég taki vettvanginn ekki alvarlega - nema það sýni að ég búi alls ekki yfir línulegri hugsun), ég er að velta því fyrir mér hvort það sé pirrandi...
Ætli þetta sé ekki gott bara, ágætt í bili svona miðað við að ég steingleymdi hvað ég ætlaði að segja og man það ekki enn.

Með títuprjóna undir nöglunum

2008-02-12T15:33:00.000Z

Evran er komin yfir hundrað... frábært. Er ekki kominn tími til að gera eitthvað í þessu? Það er hell að búa í útlandi og fá borgað í skítakrónum. Tökum bara eitthvað annað upp, bara eitthvað! Ef ekki evruna þá tékknesku krónuna eða tansaníska sjillinga... bara eitthvað annað en þetta jójó.

Góður Bubbi

2008-02-11T22:57:00.000Z

Ég er ánægð með Bubba Morthens í dag: http://www.visir.is/article/20080211/LIFID01/80211075
Nóg af xenophobíu. Hef aldrei skilið hvers vegna Íslendingum finnst sjálfsagt að þeir fái að ferðast um allar trissur, kaupa sér hús í Torreviaja eða Torremolinos eða vottever án þess að læra orð í tungumálinu (það er svo sniðugt þegar þjónninn segir: mamma borga!) en svo á Ísland að vera fyrir Íslendinga, án þess að sú skilgreining sé endilega alveg ljós. Svo finnst fólki alveg frábært hvað Vestur-Íslendingar í Kanada skuli enn halda í íslenska menningu, baka flatbrauð og tala frónskuna, en kvartar svo og vælir yfir því að finna dýrindisilm af karrý og kókos frá nágrönnunum nýaðfluttu. Uss.
Allir á tónleika!

AAAAAAAAAAAAAAAAAAAAAAAAAAAAAARGH!

2008-02-11T12:54:00.001Z

Evran er komin upp í 99,45! Helvítis króna, helvítis andskotans króna og allt þetta pakk með andskotans einkaþoturnar sínar á Reykjavíkurflugvelli.

Oj bara og sveiattan

2008-02-11T11:26:00.001Z

Það er ljótt að reykja.

Fílsungar

2008-02-08T10:25:00.001Z

Geit-ungar. Hverskonar orð er það? Rost-ungar? Hvernig eru fullorðnir rostar? Með tennur. Fílsungar eru ekki með tennur en fullorðnir fílar eru oft með glæsilegar tennur. Mannskepnan er andstyggileg, hún drepur fíla fyrir tennur. Býr til tilgangslaust pjatt úr þeim og þá kallast það fílabein, en er í rauninni tönn (eru tennur kannski bein, Hildur?). Í Kenýa bakk in ðe dei (áður en fólk fór að drepa hvert annað úti á götu) voru haldnar fílatannabrennur til að klekkja á fílabeinsiðnaðinum. Það virkaði víst. Ég veit ekki hvort að bálkestir komi að einhverju gagni núna til að bæta ástandið í Kenýa (nei, ekki Kenýu, ég þoli það ekki sérstaklega ekki þegar fólk skrifar það með einföldu: Keníu - viðbjóður). Eníhú, það sem ég er semsagt að koma til skila hér er að það eru geitungar í hengirúminu - 2stykki. Hvað lifa geitungar lengi? Ætli þeir verði að geitum í lok dags? Höhöhö.

Barselóna enn á ný

2008-02-05T13:29:00.001Z

Jæja, þá geysist ég fram á bloggvöllinn enn á ný. Ég er komin til Barselóna aftur og bý nú í íbúð Silviu fögru sem er að svala flökkueðlinu í Tælandi. Silvia keypti þessa íbúð hér í Poble Sec á svipuðum tíma og við keyptum okkar skonsu en hún er samt farin að borga niður lánin sín á meðan okkar blása út eins og bollurnar í bökunarofnunum í gær. Sjálf hef ég aðeins blásið út síðustu daga - við skruppum nefnilega til Prag í síðustu viku, þar kostar bjórinn að minnsta kosti helmingi minna en allar aðrar fljótandi veitingar og afleiðingarnar eru auðvitað þrengsli um buxnastrenginn. Bjórbumba - eða velmegunarbumba - þótti einu sinni merki um heilbrigði og sæmilegan samfélagsstatus, Hannes Hafstein þótti til að mynda myndarlegasti maður Íslands enda með svo fallega ístru að konur kiknuðu í hnjánum og roðnuðu niður í tær. En nú er öldin önnur - fita er ekki lengur móðins, að minnsta kosti ekki í hinum vestræna heimi; fyrir nokkru heyrði ég viðtal við konu í Nígeríu sem var að koma af fituhæli ("fatfarm") og var himinsæl, eiginmaður hennar var þó enn ánægðari því að flestir menn hafa aðeins efni á að senda konu sína í nokkrar vikur en hann hafði efni á að senda sína spúsu í 4 mánuði og sagðist nú eiga feitustu og fallegustu konuna í héraðinu. Ef ég væri ekki nýflutt aftur hingað í undraborgina myndi ég íhuga að flytja aftur til Afríku. En hér er ég með tékkneska bjórbumbu sem neitar að haggast þrátt fyrir dugnað minn og elju í Ravalræktinni. Ég er því farin í hungurverkfall til að mótmæla eigin fitu. Að minnsta kosti svona fram að kvöldmat. Það er móðins, skilst mér - hungurverkfall.

Audur-Ran San

2007-06-01T15:23:00.000+01:00

Hooooooh! Audur-Ran San hefur tilefni til að fá sér meira kampavín því hún útskrifast með masterspróf með glæsibrag í sumar. Góðar fréttir. Til hamingjuhamingjuhamingju og takk fyrir síðast!

VEI! VEI !VEI!

2007-06-01T14:22:00.000+01:00

Loksins get ég farið á pöbbinn! 1. júní og reyklaust loft samkvæmt lögum á öllum börum! Vei! Ég var búin að heita því að stíga ekki fæti inn á Ölstofuna fyrr en hægt væri að anda þar og því er ég að hugsa um að smella mér bara til vænissjúklinganna í kvöld. Og það er tvöfalt tilefni - því að Hildur á afmæli í dag: Happí baþdei! Nei það er þrefalt tilefni! Því að Agla var að hringja og hún er orðin maestro! Vei! Heill þér menningarmeistari! Sjáumst á barnum.

Dickflick

2007-05-28T12:37:00.000+01:00

Það hefur alltaf farið í taugarnar á mér að bækur og bíómyndir þar sem aðalpersónan er kona skuli flokkast strax undir léttmeti og kerlingamynd/bók - svokallað Chicklit eða chickflick. Reyndar þarf aðalpersónan ekki einu sinni að vera kvenkyns, mynd virðist "falla" niður í chickflickdeildina um leið og kvenpersónur eru fleiri en ein. Markhópurinn er hinsvegar strax almennari þegar karlmenn eru í fyrirrúmi í persónugalleríinu. Ég man t.d. eftir því þegar ég sá um bókaklúbba heima á Íslandi að fá endursenda bókina Matthildur eftir Roahld Dahl á þeim forsendum að það væri ekki hægt að senda strákum stelpubækur. Ég fékk hinsvegar aldrei kvörtun á hinn veginn, Jói og risaferskjan kom til að mynda ekki til baka með álíka orðsendingum. Í gær leigðum við The Sentinel. Hún er um harða karla með byssur. Alvöru dickflick. Eva Longoria fékk svo að vera með svo hún gæti ranghvolft augunum þegar strákarnir sendu one-linera sín á milli um hversu mikil bomba hún er. Ég gafst upp snemma og fór að sofa. Ég er líka leið á því að sjá Michael Douglas krumpast framan í yngri konur.

Skotland á sunnudegi

2007-05-27T15:17:00.001+01:00

Ég sit inni í stofu hjá Hermanni og Auði í Edinborg og raða í mig góðgæti. Í gær fór ég með Ástu á Ceilidh í Assembly Rooms. Þar hanga 3 kristalskrónur á stærð við fíla neðan úr rjómalituðu loftinu en undir þeim djöflast fólk á öllum aldri með pilsaþyti og hlátrasköllum um salinn. Í hlé kom furðuflink dansgrúppa frá Írlandi (Absolutely Legless) og dansaði Michael Flatley út af kortinu. Í lok dansleiksins kom Steve, heljarmenni úr hálöndunum, og pípaði okkur, þ.e.a.s. hann kom og spilaði á sekkjapípu, gekk um salinn og stóð svo trampandi fótunum úti á miðju gólfi og spilaði þannig á hljóðfærið að fólk klappaði, stappaði, flautaði og hrópaði af gleði. Því miður var ég ekki með myndavél.
Við ákváðum að fá okkur einn viskí á Dirty Dicks, sem er pöbb en ekki klámbúlla þrátt fyrir nafnið, á Rose Street. Þar uppgötvuðum við ofurmannlega eiginleika sem við vissum ekki að við byggjum (bjuggum, búum? hmmmmm) yfir, sáum furðulegt fólk, her af sköllóttum mönnum, hálft körfuboltalið unglinga, gæsir í bleikum jökkum og sérlega drukkin hjón í Riminigöllum, líkast til komin beint af flugvellinum.
En nú er sunnudagur og sólin skín inn um gluggann, Sölvi sefur en við hin kúrum yfir tölvuskjám, hvert okkar í eigin netheimi. Það er stundum svo ágætt að gera ekki neitt.

veðravíti

2007-05-21T13:19:00.000+01:00

Ég get ekki bloggað nema örstutt, því að hér er sumar og sól og ég verð að smella mér á ströndina því Esjan er hvít og engu spáð nema rigningu í Skotlandi alla næstu viku. Best að nýta þetta! Bera á sig sólvörn og pakka svo niður öllum sumarbúningum. Norte norte, aye aye aye!

Hvað gengur fólkinu til?

2007-05-13T17:44:00.000+01:00

16 ár. Er það bara ekki orðið gott? Hvernig í ósköpunum bætti D við sig 3 þingmönnum? Allur auður er kominn á hendur örfárra manna, þjóðin er skuldum vafin með blóð írakskra borgara á samviskunni auk náttúruspjallanna uppi á öræfum og annað eins á leiðinni. 4 ár til. Ég er búin að reka títuprjóna í augun á mér og undir neglurnar, skafa húðina með ostaskera af sköflungnum á mér og drekka asinton, en mér líður ekkert skárr. Off! Ég hef ákveðið að leggjast í pólitíska útlegð, ég neita að búa í sjálfstæðisbæli ... og F hélt sínu! Off! Off Boff! Og rassgat. Auglýsi hér með eftir huggulegri íbúð í Barselóna eða Skotlandi.

Litli tölvufanginn

2007-05-12T14:48:00.000+01:00

Það er sumar í Barselóna: salsatónlist glymur um Poble Sec og einhversstaðar eru Brassar og Afríkanar að berja trumbur. Fuglarnir syngja og sólin skín, fólk situr á kaffihúsum eða fær sér lúr á ströndinni. Allir nema ég. Ég sit inni við tölvuna mína og þýði allskonar litla texta á milli þess sem ég bölva og ragna því að tölvan mín hreytir annað slagið í mig þessum skilaboðum: Limited or no connectivity. Sem er bara bull og svo segir hún: No wireless adapter available in the system. Sem er líka bull. En ég fæ engan botn í þetta og eina sem ég get gert er að slökva á tölvunni og kveikja svo á henni aftur. Það hef ég gert fjórum sinnum í dag. Gaman.

Back in the USSR

2007-05-10T22:53:00.000+01:00

Júróvisjón - for alvor... hvað er pointið, hádramatísk dragdrottning frá Danmörku komst ekki einu sinni áfram. Hýra fönksveitin fra´Belgíu ekki heldur. En cheapest chic on the block í pjötludressinu flaug í gegn með hárlengingar að vopni. OY VAY! En aðalkeppnin lítur ágætlega út og Auja og Tóti hafa keypt sjónvarp í tilefni dagsins. Vei!

Til eru fræ

2007-05-07T18:13:00.000+01:00

Ég vildi bara segja frá því að við Embla erum að fara á tóneika í kvöld með Mick Harvey and the Bad Seeds. Hljómar furðulega, ekki satt. Eins og einhver hliðarveruleiki. En sumsé ekki Nick og Bad Seeds heldur Mick og Bad Seeds. Ég sem hélt alltaf að Mick væri fræ sjálfur. En hvað er þá Nick?

HVAÐ????!!!!!

2007-05-04T14:28:00.000+01:00

Kosningahitinn búinn að gjörsteikja allt þarna heima. Við fengum ÞESSA sendingu í dag hingað á Borrell. Ég ... ég bara ... nei, ég á ekki til eitt einasta orð. Ekki eitt.

Embéellpúnkturis

2007-05-03T10:51:00.000+01:00

"Ég var undir vatni í blautbúningi ..."

Einhver niðurskurður þarna í prófarkalesaradeild mbl? Hver er þýðir eiginlega þessar fréttir?
Höff.

Ekki fá grillur yfir grjótinu mínu

2007-05-02T16:04:00.000+01:00

Það er eitthvað búið að taka sér bólfestu undir vinstra herðablaðinu á mér. Mjög vont. Ég hef reynt að ropa, teygja úr mér, hanga, liggja, hoppa og anda djúpt en þetta haggast ekki. Það kommentar enginn lengur á þetta blogg. Það er leiðinlegt - ég hef áður sagt hversu barnaleg ég er: nenni ekki að blogga þegar ég fæ ekkert fídbakk.
Ég er með Jenny from the Block á heilanum: Don't be fooled by the rocks that I got; I'm still I'm still Jenny from the block, used to have a little now I have a lot but I know where I come from. Æðislegt. Rosalega gott að vinna þegar þetta helvíti sönglar í hausnum á manni á replay.
Komst að því að thaibuxurnar mínar sem ég tók miklu ástfóstri við á Indlandi hafa hlaupið um 10sm í þvotti.
Þarna er ég á bazaar í Jaipur, veit ekki hvað er með þessa pósu, Miss Tyra myndi slá mig utan undir og svo faðma mig (atleast I'm showing neck) en þarna eru umtalaðar brækur, og hanga niður við ökkla, í dag eru þær á miðjum kálfa hér um bil. Skelfilegri útskýring á þessu gæti verið að buxurnar hafi ekki hlaupið heldur að ég hafi hlaupið í spik á Spáni. Það væri alveg til að toppa daginn hjá mér.

1. maí

2007-05-01T22:35:00.000+01:00

www.solvibloggar.blogspot.com

Leyni-þjónustan

2007-04-29T10:25:00.000+01:00

Í París má finna veitingastað sem er rekinn af blindum. Þar er niðamyrkur og sjáandi og ósjáandi flykkjast þangað til að borða mat sem enginn sér. Eigendurnir græða á tá og fingri. Mér datt í hug, sökum umræðu um spíóna hér að neðan, að stofna veitingastað með leyniþjónustu. Þar munu þjónar stelast til að afgreiða kúnnana, lauma veitingunum á borðið svo lítið beri á. Ég mun ábyggilega græða á tá og fingri.

Engin mynd í dag

2007-04-28T18:57:00.000+01:00

Í dag er ég aftur komin upp í Poble Sec, en hér var ég einmitt síðustu helgi, í íbúðina hennar Silviu. Silvia segist vera þýðandi eins og ég og er víst óskaplega bissí og fannst tilvalið að við værum bissí saman. Mér fannst það sniðug hugmynd þar sem að Úlfur litli er með vírus og er með nettan kofahita á Borrell. Ég er samt ekki viss um að S. sé þýðandi, mig grunar að hún sé njósnari - svona eins og Sidney Bristow, ég hef margt fyrir mér í þessu, ekki síst að síðast þegar ég var hér og fleygði mér í hengirúmið á terrössunni þá hringsóluðu 2 þyrlur yfir húsinu. Hmm. Spennandi. OOX skaust í búðina - riiight, er ábyggileg að droppa upplýsingum í ruslafötu og koma í veg fyrir úraníumsmygl til Írans en ég læt eins og ekkert sé, annars gæi farið illa fyrir mér sjálfsagt.

Háloftin

2007-04-27T13:37:00.000+01:00

Þetta er loftið í moskunni í Taj Mahal, ansi fínt, rauður sandsteinn og hvítur marmari. They don't make 'em like they used to. En frétt dagsins er þessi: Eftir 4 daga krús um heimasíður helstu flugféga í heimi varð lendingin (æ, kræst) sú að fljúga frá Barsa til Edinborgar 22. maí og leggjast þar upp á ljónaparið svokallaða - Auði Rán og Her-man - í 9 daga. Við komum því til Reykjavíkur 31. maí og bregðum þar með út af áralangri hefð að koma heim 7. júní. Þar hafiði það.

P.S. Klara! Takk fyrir mig! K&K.

Fyrir meistaraliðið í Edinborg

2007-04-26T13:02:00.000+01:00

Á Indlandi er til sérstök rúta fyrir fólk eins og Auði Rán og Þorgerði Öglu: Panicker's Travel. Já, taugasjúklingar ferðast - nú er Agla að lenda í Glasgow. Dömurnar skila in mastersritgerðum á morgun: víhí! Þið verðið að drekka eina krónu handa mér á huggulegum pöbb, lassies.

höhö Monkey Business

2007-04-25T18:00:00.000+01:00

Aparnir við Ganga gamna sér þarna, sniðugt hjá þeim, svo er bara að stinga sér út í og þá skolast allar syndir burt og þeir koma alveg óspjallaðir upp úr. Jáhá. Mér datt í hug að einhverjum barnaheilanum þætti þetta skemmtileg mynd þannig ég smellti henni inn til að þurfa ekki að vera sniðug og hnyttin svona í textaformi, enda held ég að ég sé bara alls ekki jafn fyndin lengur og ég var. Hugsanlega vegna þess að ég er alltaf að verða betri inni í mér. Húmorinn hjá mér var alltaf frekar illkvittinn í den þegar ég var fyndin, svona fyndin á kostnað annarra (samt oft svo sem á eigin kostnað) og það er bara ekki sniðugt. Eftir að ég fann mig á Indlandi lét ég af öllum slíkum ósiðum. Héðan af segi ég bara kúk og piss brandara og birti dónamyndir af dýrum. Eru þetta annars ekki ábyggilega apar? Baksvipurinn og halinn þarna hjá karldýrinu minnir mig á mann sem ég vann með einu sinni ... nema þessi er smáfríðari. Ábyggilega apar, apapar, barapapar. Hnegg hnegg.

Íslenskur lopi, frönsk á

2007-04-24T22:27:00.000+01:00

Ég lofaði mynd af Sölva í peysunni við Signubakka, fann ekki betri myndir en þessar, reyndar er hann með uppbrettar ermar og með sólina á bak við sig þannig að peysan sést voða lítið - en það sést þó að þetta er alvöruflík. Sko strákinn.

Hliðar saman

2007-04-24T10:35:00.000+01:00

Agla kom í heimsókn til Parísar og keypti sér föt. Hún stóð ekki á veggnum, eins og margir gætu talið af þessari mynd, því glöggir sjá að þarna er kommóða sem stendur heldur ekki á veggnum. Myndin er nefnilega á hlið og ég kann ekki að snúa henni án þess að skemma hana. Það vil ég ekki, því að Agla er alveg trés parisienne þarna. Vildi bara deila þessu með ykkur - svona sideways.

Festiu

2007-04-23T20:45:00.000+01:00

Í dag er bókadagur hér í Katalóníu - St. Jordi. Þá eiga konur að gefa mönnum bækur og menna ð gefa konum blóm. Dæmigert - hann fékk bók en hún fékk nál og tvinna... en á þessu heimili er þessu öfugt farið og á meðan Embla gaf bónda sínum rós þá gaf hann henni doðrant og mér lítið listaverk í bókarformi. Úlfur fékk bók um lítinn karl sem er prumpað úr beljurassi. Myndin hér er úr stjörnuathugunarstöð Maharajans í Jaipur. Hann var sniðugur karl.

Hengirúmið hennar Silvíu

2007-04-22T11:17:00.000+01:00

Ég er í íbúðinni hennar Silvíu vinkonu sem skrapp til Cordoba um helgina. Hún á hengirúm úti á svölum sem kallar á mann og truflar mann við vinnu. Ég er nokkuð stolt af mér að láta þetta sírenukall sem vind um eyru þjóta og sit nú sem fastast við borð inni í stofu að þýða Sandy karlinn, fer svona einn rúnt á netinu þegar hávaðinn í hengirúminu er sem mestur. Annars er sumarið bara komið í Barcelona, sól og tuttugu stig, ég er að venjast loftslaginu smám saman en sit samt vafin í pashminu enda meira en tuttugu stiga munur á Indlandi og Spáni núna. Það verður ágætt að fá smá sumar - fara á ströndina og kannski jafnvel í sjóinn - áður en maður heldur heim á gamla Ísland þar sem maður veit aldrei á hverju er von veðurfarslega. Ég er enn ekki komin með miða heim en Klara benti mér nú á það í fyrra að ég hef komið heim 7. júní síðastliðin 3 ár. Ég geri ráð fyrir að koma eitthvað fyrr heim núna, en maður veit aldrei. Ég ætla að minnsta kosti að bíða hér eftir Sölva sem kemur eftir 3 vikur. Í millitíðinni ætla ég í spænskunám og líkamsrækt, en maður gerir ekki alltaf það sem maður ætlar hérna á Spáni, það tekur allt einhvern veginn svo langan tíma.
Ég skammast mín: ég er búin að borða heilan poka af gúmmíböngsum síðan í gær. Viljastyrkurinn er ekki meiri en þetta, en kannski er söngur gúmmibangsa sterkari en hengirúms. Kannski er þetta eitthvað grasekkjusyndróm, 150 gr. af gúmmíböngsum til að slá á söknuðinn eftir Bjössa. En að öllum líkindum er þetta bara blanda af taugaveiklun og græðgi.

Fólk, fílar, rusl og fleira

2007-04-21T09:58:00.000+01:00

Ég sit núna við skrifborð heima hjá Emblu og Ingó í Barcelona. Þau eru góð við mig, færa mér kaffi á morgnana og bjór á kvöldin. Hér er lítill Úlfur sem er nýbúinn að læra á pedala á hjólinu sínu og talar út í eitt við heimilisfólk og sjálfan sig. Hann heimsækir mig og heimtar þá að fá að sjá "vídeófílinn" en það er vídeófíll af fílum á Indlandi.
Indland var stórt, heitt og yfirfullt af öllu; mannfólki, beljum, bílum, rusli og varningi. Minnti mann stundum á tilraun sem er við að fara úr böndunum. Ég var mjög þakklát fyrir að vera hjá Helgu Fríðu sem á mjög fallegt heimili þarna og kettling, það var ólýsanlega gott að koma heim úr hektískum ferðalögum í loftkælingu, hollan mat og familí. Við fórum bæði niður í eyðimrkursléttur Rajastahn og upp í fjöll þar sem við gistum á hóteli í 2250 metra hæð. Ég held ég hafi aldrei verið hærra uppi í heiminum. Við vorum strax farin að hugsa um "næst". Næst ætlum við að fara til Kerala og lengra upp í fjöll. Næst ætlum við að fara til Leh og kannski Srinagar. Næst ætlum við að fara á hestbak. Næst ætlum við ekki að láta KLM rukka okkur um 27 ÞÚSUND krónur í yfirvigt fyrir tæp tíu kíló. Já, það var semsagt það síðasta sem ég gerði á Indlandi - láta stífmálaðan KLM fulltrúa ræna mig með bros á vör. Skelfing. Það lá við að "næst" væri þurrkað út úr orðaforðanum.
Til hamingju með afmælið, mamma mín!

Nei, sko - það rignir enn

2007-03-24T14:50:00.000Z

Haldiði ekki að ég sé bara ekki aftur komin inn á blogger sem er allur en francais hjá mér þessa dagana! Mais það var nú svo sem ekkert merkilegt sem ég ætlaði að segja, Embla kom hingað frá Spáni síðustu helgi og gerði allt vitlaust, le soleil stakk okkur af og í staðinn fengum við blautan, þæfðan himinn sem meig út úr sér ýmist rigningu eða slyddu á milli þess sem hann grýtti borgarbúa með hagli. Sacre Coeur! Eins og Hulda sagði. Blessunarlega er haglið for bi en það rignir enn - quelle domage, hugsið þið en non, þá hangir maður inni og vinnur ... eða horfir á 10 þætti af Heroes eins og við Sölvi gerðum í gærkvöldi. Ég fann þetta á netinu og þar sem við eigum óhemju mikla netinneign og erum á förum þá leyfðum við okkur að glápa á þetta online í gær. Kvöldið minnti á 24 maraþonið á Njallanum í fyrra: "Einn enn?" " Einn enn?" "Einn enn?" "Ok, einn enn." "Einn, og svooo förum við að sofa." Annars lofar BBC bót og betrun í veðurmálum og gengur svo langt að lofa 17°hita og sól eftir helgina. Þá ættum við að geta lagt okkur í garð hérna á miðvikudaginn áður en við höldum til Heathrow í olnæter þar. Terminal 4 - uppeldisstöðvar mínar. Alors, je vais. Merci. A bientôt.

París

2007-03-22T13:56:00.000Z

Einhverjar kvartanir hafa borist yfir óskaplegri bloggleti minni, en ég hef því miður bara ekki fundið hjá mér þörf um nokkurt skeið til að tjá mig á þessum vettvangi. Ég er nefnilega í París. Í París er hægt að finna sér ýmislegt annað til dundurs en að hanga á netinu og blogga um eitthvað bull sem maður hefur lítið eða ekkert vit á. Í París gengur maður bara um og drekkur í sig fegurð borgarinnar og fær sér kannski Pelforth brun í eftirmiðdaginn. Fyrripartinn drekk ég kaffi við Pont Louis Philipe, stend með Sölva við barborðið og skelli í mig þykkum, dýrindis espresso. Sölvi hefur borðað ósköpin öll af entrecôte og karameliseraðri önd en ég heimta að fara til grænmetissalans við litlar undirtektir. Við höfum fengið gesti: Huldu og Ástu, Ingu Þóru, Öglu og Emblu. Einnig höfum við hitt hér Finn, Emmu og Óðinn (söngvararnir eru hér til að syngja) og Ragga og Jing sem koma annað veifið frá Lúxembúrg. Sölvi er einmitt þunnur eftir ótæpilega drykkju á belgískum bjór í gær með Ragnari. Hann gengur hér um og segir: Þú átt að vera góð við mig! Það þýðir að ég eigi að hætta að blogga og koma með honum út í frískt loft og kókleiðangur. Ætli ég láti það ekki eftir honum, maður má alveg vorkenna fólki sem líður illa þótt það hafi skapað sér þá vanlíðan sjálft. Det synes jeg, aligevel. Oui, biensur. Au revoir. Næsta blogg verður kannski bara frá Indlandi.

Scotia kvödd

2007-01-31T09:36:00.000Z

Hér í Skotlandi hefur ýmisleg gerst. Til dæmis þurfti ég að stofna nýjan notanda á tölvunni minni því að gamla notendanafnið mitt á henni var allt komið í pikkles og neitaði að setja upp vírusvarnir og rabbforrit sem mig hafði lengi vantað. Ég komst að því að sami gallinn hafði lokað mig út frá Blogger, en eins og kannski þrjóskustu bloggflakkarar muna þá gat ég ekki bloggað þessa mánuði á Íslandi nema með því að ræna ofurbók bróður míns. Nú er aldrei að vita hvort þessi blessaði veflógur rísi ekki upp og veiti skapandi skrifum útrás.
Skotland er fallegt, það hef ég oft sagt áður, en þetta er ekki aðeins mín skoðun heldur bláköld staðreynd. Hér er himinninn hár, birtan blíð og nautgripirnir loðnir. Ég leit upp í himinninn rétt í þessu og sá hvar tvær flugvélar höfðu krossað saltírufánann í blámann, St. Andrew's krossinn. Væri myndavélin við hliðina á mér myndi ég smella af og líma hér inn myndina fyrir ykkur að sjá, en myndavélin er inni hjá skáldinu sem sefur. SB er ekki aðeins skáldið sem sefur heldur líka skáldið sem prjónar peysur. Hann kláraði peysuna sína í gær og hún fer honum einkar vel, sérstaklega þegar hann brosir stoltur. Skáldið sem eltir buffalahjörð upp á kastalaplan og nær sér í dýrindissteik. Hvað er betra en að standa í sinni eigin peysu, éta buffal og syngja heimatilbúna texta við lög Bon Jovi's? Ekki margt, nema kannski þá að sitja á Signubökkum með rauðvín og góðan ost og dikta ofan í dagbók.
Á morgun kveðjum við Skotland, skiljum Auði Rán eina eftir í höllinni (Ó, Hermann, kom heim!) og fljúgum með auðveldri þotu til Parísar. Ég læt þessu því lokið, nú þarf ég að sinna Kjarvalsstöðum, lágmenningarlegur þjónn hámenningarinnar - það er ég.

Um Fljótandi heim

2006-12-20T18:12:00.000Z

**** Áhrifamikil, frumleg og nútímaleg saga sem tekst á hugrakkan hátt á við bókmenntirnar og samtímann. (KHH, Fréttablaðið)

Bókmenntaverk sem talar við okkur hér og nú ... af mikilli list flettir Sölvi ofan af þeim raunverulegu orsökum sem skýra hegðun persónanna ... Og af því er fengist við stórar spurningar um ástandið í heimi okkar í dag, þessum fljótandi heimi, þá hrærir sagan við okkur bæði á yfirborði og undir niðri ... Sagan heldur manni fast við efnið og þessi lesandi beið spenntur eftir framvindunni eins og við á í glæpasögu. Munurinn er aðeins sá að við vitum ekki hver glæpurinn er fyrr en í lokin. Mest er þó um vert að fá í hendur skáldsögu sem stendur undir nafni í því að hún segir sögu okkar sjálfra með trúverðugum hætti um leið og hún fer út fyrir hinn hversdagslega reynsluheim okkar með samtali sínu við heimsbókmenntirnar.(GK, Víðsjá)

Áræðin og grípandi skáldsaga eftir kjarkaðan höfund. (KG, Kistan)

Tilraun Sölva með Murakami er vel heppnuð. Það er ekki ný hugmynd að skáld sem koma fram á ritvöllin þurfi að takast á við bókmenntahefðina og öll meistaraverkin sem þegar hafa verið skrifuð. Að bæta sjálfum sér í þann flokk er sannkölluð grettisglíma. En í stað þess að berjast fyrir lífi sínu gerir Sölvi sér leik að þessari rökhyggju bókmenntalandslagsins og skapar sína sögu í skugga stíflunnar miklu. Sagan sem liggur verkinu til grundvallar reynist hafa bæði mannlegar og harmrænar víddir. (BÞV, Morgunblaðið)

Svona nú! Út í búð, það leynist margt gott innan um það sem er auglýst fjandans til. Gleðileg jólainnkaup!

Bloggerdrasl

2006-12-04T13:07:00.000Z

Nú hef ég reynt í tvo daga að setja inn bloggfærslur hérna en það gengur ekki með pc tölvunni minni, helv. bloggerdraslið neitar að birta nokkuð. Það er því ekki við mig að sakast að engin hreyfing er á þessu bloggi mínu þar sem að ég virðist þurfa að stelast í makkann hans Einsa bróður til að koma einhverju á blað. Ég hefði auðvitað aldrei skipt úr makka yfir í pésa ef þjónustan hjá Apple hefði verið viðunandi sem hún var alls ekki. Pirr pirr. Annars er ég að horfa á Justin T. dansa My Love. Hann er furðulegt fyrirbæri, hann ætti að vera vibbavæminn með þessa rödd og beibífésið en hann er það alls ekki heldur fáránlega flottur og kúl. "Segðu að ég sé að setja jólaseríur upp - ég verð nefnilega ekki heima um jólin," segir Einar Örn sem er að hengja upp jólaseríur og greni á svalirnar hjá sér, hann verður nefnilega ekki heima um jólin.
Þetta fólk er á leiðinni til Íslands um jólin:
Embla og Ingó (16. des.)
Gummi og Kaja (22.des)
María og Sjonni (ekki alveg með dags. á hreinu)
Auður og Hemmi (tuttugasta og eitthvað?)
Endilega látiði mig vita ef fleiri eru á leiðinni. Ásta, t.d. - hvað með þig?

Sjoppenhavn

2006-11-30T12:48:00.000Z

Jásör, þá hef ég enn og einu sinni stolist í litlu ofurbókina hans Einars bróður. Ég ætlaði að segja ykkur frá ferð okkar SB til Kaupmannahafnar en eg bara nenni því ekki. Þetta var voða dejligt, við hittum fólk, fórum í göngutúra, mændum upp á hús skáldsins sem datt í stiganum, drukkum jólabrygg og lásum aðeins upp úr bókum. Já, og fórum göngutúr um Tívolí sem var fjarska jóló. Á morgun er jólaboð Eddu og mér tókst að kría út boðskort sem ég fékk í hraðsendingu í morgun, ég vildi ekki fara sem viðhengi SB og beitti andlegu ofbeldi til að fá mitt eigið boð.
Annars las ég Skipið hans SM í gær, las hana upp til agna í einum rykk. Mér fannst bókin spennandi og mjög flott stemning í henni, sé hálfpartinn eftir því að hafa ekki átt hana til góða á jóladag, því þá á maður að liggja undir sæng með svona page-turner, drekka heitt glögg og japla á smákökum. Þannig ég er mjög ósammála furðulegum dómi á Kistunni um bókina... og finnst einkennilegt reyndar að AM skuli alltaf reyna að slá tvær flugur í einu höggi í þessum dómum sínum. Hann hnýtir þarna í Stefán og allt að því patróniserar hann með ráðleggingum og ummælum um einhverja forlagspólitík sem mér finnst alveg afleitt. Hann gæti sjálfur alveg þegið nokkur tips frá hinum Mánanum sem er agaðri og betri penni - já, og hananú! Í nótt byrjaði ég á Sendiherranum og les hana til skiptis við Skugga vindsins sem ég fékk með hraðsendingunni í morgun. Læt vita hvað mér finnst um þær seinna... kannski, ef ég nenni því. Það er ekkert svo auðvelt að blogga þegar maður þarf að fara í heimsókn til þess. En, nú ætla ég að fara að sinna erindum sem Skipið tafði mig frá í gær.

Instant gratification

2006-11-17T15:15:00.000Z

Ég nenni ekki að blogga þegar ég fæ engin komment. Ég er ungabarn að þessu leyti. Er ekki annars y í því? Bladíblí. Bladýblý.

Upplyftingar

2006-11-16T15:54:00.000Z

1. Fara á Súfistan í kvöld og hlusta á listaskáldin góðu - þar á meðal Sölva Björn - lesa upp úr verkum sínum í tilefni dagsins (dagur íslenskrar tungu og afmæli Jónasar)
2. Fara á Sykurmola á morgun
3. Kíkja í bíó á Borat - listaverk!
4. Lesa Fljótandi heim eftir Sölva Björn Sigurðsson (hún er á metsölulista Eymundsson(ar?))
5. Lesa Hið stórfenglega leyndarmál heimsins eftir Steinar Braga - eiturfyndin og stórsnjöll
6. Fara á Babalú á skólavörðustíg og fá sér latte og lesa blöðin eða hanga á netinu
7. Fara á Garðinn á Klapparstíg og fá sér dýrindissúpu í hádeginu
8. Fara á Barinn (22) og fá sér plokkfisk
9. Hlusta á BBC Worldservice og drekka heitt kakó undir teppi
10. Fara á Umbreytingu í Þjóðleikhúsinu - stórkostleg sýning Bernd Ogrodnik

Reykjavik

2006-11-15T18:10:00.000Z

Það er skítkalt í dag - en Esjan og Skarðsheiðin eru fallegar frostslegnar og fjólubláar. Hafið flöskugrænt með hvítum öldutoppum og himinninn roðnar strax upp úr tvöleytinu. Frekar vil ég hafa kalt og fallegt en "hlýtt" og grátt. Leiðinlegir þessi týpísku Reykjavíkurvetrar þegar það er eins og það hvíli skítugt, blautt ullarteppi yfir öllu.

Æ, ætlaði ég ekki að tala um reykingar á skemmtistöðum? Ég bara þoli þær ekki. Hvorki líkamlega né andlega - þær fara í skapið á mér, helvítis ofbeldi, finnst mér. Ég þekki fullt af góðu fólki sem reykir og sem mér þykir afskaplega vænt um, en það ætlar mig lifandi að drepa (og ég meina það bókstaflega). Þegar maður finnur stæka reykingafýlu af brjóstarhaldara sínum daginn eftir útstáelsi, brjóstarhaldaranum sem maður var í undir hlýrabol, kjól og peysu, þá getur maður ekki annað en orðið hræddur um hvernig öndunarvegurinn, húðin og augun í manni eru eftir þetta. Staðir eins og Ölstofan eru ekki nema fyrir hörðustu nagla og fólk með alvarlega sjálfspíningarhvöt, ég með minn astma þoli amk ekki þar við nema í 10 mínútur í senn. En nú skilst mér að það eigi að taka á þessu máli og þótt ég vorkenni mínum ágætu vinum að þurfa að fara út í kuldan að reykja þá vorkenni ég mér meira fyrir að geta ekki farið út að fá mér kollu án þess að anda að mér svo viðbjóðslega eitruðu lofti að augun á mér verða rauð og þrútin, röddin í mér eins og í froski og fötin mín svo stinkandi að ég verð að hafa þau frammi á gangi þangað til þau fara í þvottavélina. Já, og svo vaknar maður með satanískan hausverk daginn eftir. Þynnka er nefnilega 90% óloftið sem maður andar að sér á bar, komst ég að í Skotlandi eftir að reykingar voru bannaðar þar. Það var stórkostlegt að geta farið út á bar og liðið bara vel, vaknað síðan hress daginn eftir og farið í fötin frá því í gær. Oftast þegar maður fer út reynir maður að fara í fín, hrein föt en eftir 2-3 tíma á bar verða þau svo mettuð af reyk og ólykt að þau verða að fara beint í óhreinatauið. Það sér það hver maður að endingin á fíneríinu verður ekki mjög mikil eftir alla þessa þvotta. Hmm, ha? O, seisei, nei.

Ok. Þá er ég búin að ræða þetta mál og standa við það loforð. Ég er annars eitthvað svo óskaplega andlaus og nenni óskaplega sjaldan að blogga eitthvað lengur. Það er eins og maður hafi minni tíma hérna heima á Íslandi, en samt finnst mér ég ekkert vera endilega að gera meira en ég geri úti, en tíminn þýtur hjá, dagarnir stuttir og flestir sem maður hittir eru á þönum, hangandi á kjúkunum fram af hengifluginu, hlaupandi eins og hamstrar á hlaupabrettum sem þeir kunna ekki að slökkva á. En næst ætla ég að gera listablogg og mæla með nokkrum hlutum fyrir þá sem kunna að stökkva af brettinu.

Blöddíblogger

2006-11-15T18:03:00.000Z

Vesen að setja inn færslur í dag.

Heimsglaumurinn

2006-11-10T18:21:00.000Z

Það var ótrúlega vel mætt á Barinn í gær og húsið fullt af góðu og skemmtilegu fólki á öllum aldri. Steinar og Sölvi stóðu sig vel, lásu upp úr bókunum sínum við mikinn fögnuð og skenktu fólki bjór og viskí fram eftir kvöldi. Eymundssonskvísur sátu við borð og seldu fólki bækur og gestir kepptust við að skrifa póstkort til ástvina sem voru sett í kassa og notuð í happadrætti síðar um kvöldið. Harpa hét vinningshafinn og hún vann rauðvínsflösku og 2 bækur (Hið stórfenglega leyndarmál Heimsins og Fljótandi heim). Póstkortin verða svo send af forleggjurunum á áfangastaði eftir helgi. Ég smelli kannski inn nokkrum myndum af kvöldinu seinna í vikunni.
Ég nenni eiginlega ekki að röfla yfir Beverly Hills 90201 - þetta eru bara ömurlegir þættir, þeir voru það in ðe næntís og hafa ekki batnað með tímanum. Skjárinn sýnir margt misjafnt en hann ætti að skammast sín fyrir að endursýna þetta krapp (og það nokkrum sinnum í viku). Viðbjóður. Næst ætla ég að röfla yfir reykingum á skemmtistöðum sem er viðbjóður og ástæðan fyrir því að ég er með hausverk núna.

Bilastæði og bjor

2006-11-09T17:19:00.000Z

Jamm ég þoli ekki að geta aldrei lagt heima hjá mér vegna þess að gatan er alltaf yfirfull af bílum frá fólki sem tímir ekki að nota bílastæðahúsin. Það ömurlegasta við þetta allt saman er að meirihluti þessara bíla eru risahelvítis jeppar. Fólk kaupir sér margra milljón króna jeppa en tímir svo ekki að borga 100 krónur í stöðumæli þegar það fer á helvítis Súfistan að lesa tímarit úr búðinni. Í Edinborg er eitthvað sem heitir Resident Parking í miðbænum - þá mega aðeins íbúar miðbæjarins leggja í stæðin í götunum en aðrir nota bílastæðahús, bílaplön og stæði með stöðumælum. Fólk sem býr í blámiðbænum á að geta lagt bílum sínum eins og fólk í öðrum hverfum. Ég vil að stöðumæla/bílastæðagjald verði lækkað og stæði á Grettisgötu, Njálsgötu og öðrum götum í blámiðbænum verði tekin undir einkanotkun íbúa þar. Jamm. Næsta röfl verður um Beverly Hills 9020.

Hey, en á léttari nótunum: Sölvi Björn og Steinar Bragi halda veislu á efri hæðinni á gamla 22 í kvöld (frá 8) og bjóða upp á spjall og bjór og jafnvel einhvern upplestur. Gott fólk á endilega að láta sjá sig.

Lífgunartilraun 1

2006-11-07T16:04:00.000Z

Ég veit að ég ætlaði að byrja aftur að blogga í september en það var bara argasta bjartsýni því að bókabransinn er jú á fullu á haustinn og ég hafði ósköp lítinn tíma til annars en að þýða, prófarkalesa og fikta í textum. En karnivalið er að fara að byrja - hin árlega uppskeruhátíð íslenskra bókaútgefenda og þá nefni ég auðvitað strax til sögunnar glænýja skáldsögu Sölva Björns sem kom með skipi í dag. Hún heitir Fljótandi heimur og ætti að birtast í bókabúðum á fimmtudag-föstudag. Þess má geta að skáldið braut sjálft um bókina og gerði kápuna.
En röfl dagsins hjá mér er yfir skorti á póstkössum í bænum. Ég sit alltaf uppi með hrúgu af umslögum sem ég kem hvergi í póst. Póstkassar eru hverfandi í Reykjavík og pósthúsin sömuleiðis. Ömurleg þjónusta. Röfl röfl röfl...
Á morgun ætla ég að röfla yfir bílastæðum í miðbænum.
Óver end át.